區議員：君傲灣都有綜援戶

【明報專訊】所謂民生無小事，不過有時揀服務對象都係藝術。西貢富君區議員陸平才，近日宣傳煤氣公司嘅送爐具活動，就成為網上熱話，因為宣傳單張上面提到「送贈明火煮食爐給獨居長者及綜援人士」，但活動對象係將軍澳君傲灣、天晉I同富康花園居民，前兩個屋苑係私樓，而後者就係居屋。


有網民質疑呢個活動係咪合適，因為住得喺上述屋苑嘅都應該有番咁上下經濟能力，亦有網民揶揄想捐石油氣爐，但對象係「60歲以上、身家過千億合資格香港人」。


陸平才噚日回覆Emily時好勞氣，直斥網民「不知所謂」，解釋話個活動其實每個選區都有，視乎當區區議員有無推廣，又話富康花園居民多數喺若干年前買入單位，批評「用今日樓價去睇番當年嘅，呢批人係咪食錯藥啊？呢啲人鬧乜嘢呀？」佢話，據佢了解，君傲灣都有綜援個案喎。