使館人員關心李波案 向港記收風

【明報專訊】北京兩會期間，好多香港記者都去咗北京收風，了解中央對香港局勢嘅研判，但勢估唔到香港記者會成為「外國勢力」嘅收風對象。有外國使館嘅人員都趁兩會想同香港記者收風，了解港人對李波事件嘅睇法。


香港記者喺北京都有遇到有使館人員搭訕，想了解一下港人點睇李波，例如大家信唔信李波係自己去內地嘅說法、點睇政府處理方式，以及港人家點睇整個中國政治。不過使館人員自己就無表態嘞。


此外，噚日有唔少中外記者雲集人民大會堂嘅人大香港團公開會議，唔少記者都追問港區人代點跟進李波事件。人代之一吳亮星引述過「洗頭艇」論，唔少記者都追問佢對銅鑼灣書店嘅睇法，但星爺話唔適合喺人大會議嘅時候回應，因為大家都係討論緊總理李克強嘅工作報告。