民協流「淚」爭M痛假

【明報專訊】相信唔少女士同Emily一樣每月飽受生理周期嘅痛苦，民協一班女成員噚日喺「三八婦女節」前夕，喺臉上貼住「眼淚」去政總外請願，要求爭取每個月有一至兩日嘅「女性生理假」，希望政府率先帶頭喺公務員實施政策。


民協主席莫嘉嫻話，女性有時經痛到返唔到工，但請假要出示醫療證明文件，又畀老闆刁難，希望政府研究將生理假納入有薪病假。佢話台灣前年都開始畀女士將生理假當病假用，病假用盡後，亦有額外3日無薪生理假。