吳克儉論盡踩單車險自炒

【明報專訊】食物及衛生局長高永文早前主持跑步禮時跌倒受傷，噚日教育局長吳克儉主持「上海商業博愛單車百萬行2016」時就差啲炒車。話說吳局長帶頭排踩單車起步，但一開始就雞手鴨腳，單車左搖右震，好彩最後無炒車，總算順利起步。


痛心學生輕生

活動後吳克儉講番教育問題，話關於TSA小三試行研究計劃，邀請50間學校參與，考評局已經發出邀請信；又話據佢理解已經有學校報名，未有聽到有學校拒絕。佢仲話反而有唔少私立學校都報名，但呢方面會交番畀考評局跟進。


對於近期相繼有學生輕生，包括日前中大生自殺，吳克儉話「很痛心，真是很痛心」，呼籲大家，生命誠可貴，希望年輕人明白好多時候都會面對逆境，但逆境自強係重要嘅。佢又呼籲學校、老師同家長都要加把勁，多啲關心年輕人。