阿松老闆抱孫 多得港大

【明報專訊】全球最大私募基金黑石（Blackstone），除咗累中投「輸大錢」，最為港人熟悉應該係搵咗本港前財政司長梁錦松做大中華區主席。不過，原來佢同香港嘅淵源絕不止於此，集團主席斯蒂芬．施瓦茨曼（Stephen A. Schwarzman）就自爆，佢幾個禮拜前抱孫女，都係多得香港大學！

施瓦茨曼噚日應邀到港大演講，之後再有問答環節，佢講講吓香港響環球金融市場嘅發展優勢時，突然話要多謝港大，原來施瓦茨曼嘅公子，曾經到港大嘅法律學院就讀一個學期，讀書之餘識咗個女朋友仔，之後仲結埋婚，個孫女早幾個禮拜出世，榮升祖父嘅施瓦茨曼忍唔住話要感謝港大「make this happened！」

施瓦茨曼又勉勵港大學生，投身金融界就好似做「學徒」咁要由低做起，初時工作非常沉悶，但每次準備工夫都要做足100分，否則就會被淘汰。不過，一旦捱過早期嘅磨練，回報及工作滿足感就非常大，加上香港目前處於一個非常優越嘅位置，香港學生應該要好好把握機會。