「一名董事或買稀土礦」

【明報專訊】稀土概念股當炒，上星期又多一隻，講緊嘅係前身榮盛科技嘅蒙古礦業（1166），個名都係近期先改，目的係配合新收購的蒙古銅礦，估唔到公司咁快有興趣嚟第2個收購，上星期突然話傾緊買蒙古稀土礦，結果市場當然一窩蜂將佢落鑊炒㷫，一星期升咗約1倍。

不過小琴發現，蒙礦喺公司通告嘅寫法相當特別，原文係咁寫：「一名董事現正就可能收購位於蒙古的若干稀土礦與一位獨立第3方作初步洽談」，疑問就出喺「一名董事」身上，究竟係董事私人收購，定係代公司出面傾收購？如果係私人收購，咁蒙礦仲算唔算稀土概念股呢？

主席澄清：董事只係代公司去傾

噚日蒙礦開股東特別大會，小琴當然特登去問清楚，公司主席周禮謙澄清，通告的意思，確實係公司想收購稀土礦，董事只係代公司去傾；佢補充，現時蒙礦的size唔大，所以都會周圍留意吓唔同地方嘅礦場，蒙古嘅資源價格比較合理，所以都特別留意當地的投資機會作多元化發展。不過被問到計劃收購的稀土礦喺邊、家傾成點等問題，周禮謙就一一以收購未落實為理由，唔肯透露。

市場當然最關心股價，上星期四蒙礦份通告出咗之後，最多升過1.2倍，收市都仲升87%，之後日日都大上大落，好似噚日又急升18%，周禮謙就回應話，股價大上大落，佢都無辦法控制。

題外話，上市公司管理層平時見完傳媒，通常都會畀大家影張相作見報用，小琴都唔例外，噚日想影張周總近照，畀讀者一睹風采，點知周總話由於佢唇上有些少皮膚問題，見報唔好睇，唔肯影相。小琴平時貪靚，未執好個樣前都唔肯畀人影相，估唔到周總同小琴一樣咁貪靚！