新聞類別
財經
詳情#
【明報專訊】內地近日反日情緒高漲，四川綿陽在星期日，就有三萬幾人參加反日遊行示威，群眾邊行邊破壞沿途嘅日資公司，港資嘅味千（0538）位於當地的門店同樣遭殃，被群眾投擲雜物及石塊。
味千雖然賣日本食物、門店裝飾又似日本公司，但實際上卻係港資經營，睇番成個董事會入面，只有一位非執行董事係日本人，可惜遇上內地熱血民眾，只能嘆句「有理說不清」，每次反日示威，門店都被破壞收場，唯一慶幸係負面消息冇帶入股市，噚日大市收市跌近300點，味千收市只係跌0.1%。
味千中國門店應付反日示威的方法，其實相當被動。05年內地爆發大規模反日遊行，味千只能夠暫停營業，並在分店掛上「味千拉麵，100%港資，同族同胞，一樣愛國」的橫額；到今次示威，橫額用上類似嘅「港資企業，我們和同胞同樣愛國」，口號改左，可惜下場一樣，就係門店被砸。
賣日式麵 其實係港資
小琴做咗個唔多科學嘅小統計，發現除左味千之外，同日本拉得上關係的股份，仲有利福國際（1212）、永旺百貨（0984）、廣汽（2238）同東風（0489），利福同永旺，分別以「久光」同「JUSCO」品牌，喺上海同廣東省經營日本式百貨公司，雖然同味千一樣係港資，但好有「潛質」令熱血群眾以為係日資。至於廣汽同東風，由於佢哋同幾間日本車廠，包括豐田、本田同日產都有合營企業生產汽車，萬一事件演變成抵制日貨，或多或少都受牽連。呢幾隻股份，噚日以利福較唔爭氣，收市跌4%，而廣汽同東風微升。
報料電郵﹕piano@mingpao.com
回應 (0)
