角逐超區 范國威：畀市民鬧都唔緊要

【明報專訊】新民主同盟范國威（Gary）日前宣布有意競逐立法會超級區議會議席，但Gary喺2010年因為反對新增超區議席嘅政改方案，退出民主黨並另起爐灶，所以今次表態，就引嚟民主黨同網民批評。


稱重要嘅係守住議會戰線

Gary噚日出席商台節目解畫，被問到係咪「今日的我打倒昨日的我」，佢話新同盟嘅成員大部分同意派人出戰超區，所以新同盟應該參選。佢承認，新同盟考慮出選超區，同以前嘅主張有幾大衝突，但如果參選可以推進整體民主運動，都可以去馬喎。


Gary之後同Emily講，參選係政黨嘅責任，黨內亦唔止一個人有意選超區，佢話市民有正反意見係意料之內，「畀市民鬧都唔緊要」，重要嘅係守住議會戰線。


馮檢基撐雷動 唔怕民協無份選

另外，港大法律系副教授戴耀廷早前提出雷動計劃，希望非建制政團協調，攞到立法會半數議席。民協上個禮拜同戴耀廷坐低傾，民協立法會議員馮檢基（阿基）就成為第一個明確支持計劃嘅泛民議員。阿基話，相信計劃可以增加民主派嘅影響力。不過如果協調出嚟嘅結果，係民協無得選呢？阿基就回應，相信雷動計劃唔係要令政黨無晒機會，唔係零和遊戲。