立會第一天 楊岳橋「處男點人數」唔成功

【明報專訊】日前喺立法會新界東補選贏出嘅公民黨楊岳橋（岳少），噚日正式宣誓就任，岳少第一日做議員，就加入拉布行列，喺大會要求點算法定人數拖延時間，不過最後未能一擊即中造成流會，大會用咗約12分半鐘就湊夠人數開會。岳少之後被傳媒問到「第一次」嘅感覺如何，佢含蓄一笑，然後答「都係咁啦」，話作為泛民團隊一員，覺得點人數無乜特別，而自己喺競選時已經講明，會喺審議版權修訂條例草案嘅時候，同民主派「十上十落」咁話。


話網民就係市民

岳少話，自己懷住戰戰兢兢嘅心情上任，因為背負住16萬選票，覺得選民對佢有好大期望，強調唔會辜負選民，希望盡快適應工作環境。岳少噚日就競爭條例、旺角衝突同版權條例最少發咗3次言，佢喺審議版權條例時，就形容網絡普及下，網民就係市民，當市民有憂慮，捍衛市民權益就係議員嘅責任。


不過岳少作為新人，對議事規則可能未完全熟習，喺有關旺角衝突嘅質詢環節，佢想問跟進問題，但就一連問咗兩條，被主席曾鈺成提醒佢只可以問一條。硬知識可以慢慢補救，但岳少睇嚟充滿軟實力，噚日全日被唔少女記者包圍之餘，更加買咗蛋撻請其他議員食，打好關係。