1億六合彩變10億 馬會更正

【明報專訊】1億元六合彩激發全城瘋狂落注，以求一夜發達，不過，噚日網上就流傳一張投注站告示嘅圖片，上面中文寫住「估計頭獎基金六合彩可達1億」，但英文竟然係「1 Billion」，即10億。網民就笑「香港英文水準，得人驚！」、「一切以英文為準就發啦」。


馬會其後查出真相，話有關錯誤告示位於上環德輔道西場外投注處，起因係職員犯咗文書上嘅錯誤，噚日朝發現後已即時更正。馬會為今次溝通上出現嘅誤會同引起嘅不便致歉，仲補咗一句「祝大家今晚（噚晚）的金多寶攪珠好運」。