方國珊飛吻送本民前助選團 浩鼎被勸返東涌

【明報專訊】民建聯周浩鼎噚日下午去到沙田街市附近拉票，巧遇公民黨楊岳橋嘅助選團。助選團成員、社民連黃浩銘持咪高呼﹕「周浩鼎，你返東涌啦，東涌居民需要你！」周浩鼎助選團隨即大叫﹕「周浩鼎！3號！周浩鼎！3號！」還擊。黃浩銘就回應：「周浩鼎，返東涌服務啦！佢係東涌區議員，調區空降新界東！」周浩鼎搖一搖頭，未有理會，繼續向攝影記者揮手。


立法會新界東補選噚日7點半起開始投票，好多候選人一早起身去拉票。本土民主前線梁天琦喺facebook上載坐車去拉票嘅短片，片段中見到佢好似睡眼惺忪咬住個麵包，大嘆﹕「好眼瞓呀！」早上11點半左右，本民前嘅車喺駛去沙田途中，遇到獨立候選人方國珊嘅車，方國珊仲喺車上向本民前嘅車飛吻，本民前助選團立即喺車上起哄。


雖然各方候選人嘅政見同行動方式不同，但整體而言，噚日嘅選舉活動都算和平。