經民聯要搞魚蛋革命

【明報專訊】退休保障公眾諮詢仲未完，商界亦唔敢怠慢，代表商界嘅經民聯噚日同傳媒茶敘，主席梁君彥話下周會向全港300幾個商會發問卷，了解商界對強積金對冲、退休保障嘅意見，又會搵學者研究有咩可行方案，希望6月諮詢期完結前約政務司長林鄭月娥見面交流。


地產及建造界石禮謙就話，政府唔係好了解市場發展，覺得家經濟前景唔明朗，政府應撤銷針對工商舖嘅樓市辣招，又覺得應該重推拍賣土地嘅做法。


噚日茶敘，經民聯就提供咖喱魚蛋等小食畀大家，副主席林健鋒似乎鍾情魚蛋，仲話自己要搞魚蛋革命，又語帶雙關咁話，香港打緊逆境波，但大家唔單止無一條心，仲有人倒米、拖後腳喎。


岳少續掌旅發局

另外，政府噚日公布，再委任經民聯監事會主席林建岳續任香港旅遊發展局主席，新任期由4月1號開始，為期3年。林建岳話，旅遊業家係調整期，經營環境比較艱難，而佢深明做旅發局主席要肩負嘅重任，又話相信喺旅發局、業界同政府同心協力下，旅遊業可以通過各種考驗。