火爆姐「小心報應」片段 財爺都睇過

【明報專訊】立法會早排嘅退休保障舉行公聽會入面，關女士（圖）因機關槍式狠批政府，叫官員小心報應，講中唔少市民心聲，令佢多咗個「火爆姐」嘅花名。事後佢發言嘅片段喺網上瘋傳，獲得網民狂讚。


撐本地足球，睇過《紅van》、《狂舞派》等本土電影嘅「真港人」財政司長曾俊華，噚日出席港台英文節目時就話，自己連「火爆姐」嘅發言都睇過。佢話，完全明白社會有唔同情緒，同意政府應該聆聽同了解市民訴求，保持溝通。


對於有批評話新一份預算案無新意，曾俊華就反駁，好多人期望預算案會有戲劇性（dramatic）嘅措施，不過呢個唔係佢嘅作風。佢話處理危機嘅方式係防患未然，喺水災來臨前一段長時間堆起沙包，因為你唔知真正災難幾時會嚟。