財爺睇《十年》：導演拍攝技巧較嫩

【明報專訊】曾經多次不諱言大談「本土意識」嘅財爺曾俊華，噚日喺《2016/17年度財政預算案》中繼續展示「貼地」形象，多番提及香港人精神，又支持港產粵語電影，唔少人都讚佢夠「貼地」。


有記者就喺記招上向財爺八卦，有無睇過最近大熱嘅本土電影《十年》，雖然電影被官媒《環球時報》批評係「宣揚絕望」，不過出名愛睇戲嘅財爺就話幾個星期前有約朋友一齊睇過，但佢話電影都係虛構故事，「好多地方比較誇張一啲」，又用影評人嘅口脗講，5名新晉導演拍攝技巧比較「幼嫩」，有進步空間。


預算案封面顏色似利市

今年財政預算案以紅色為封面顏色，好搶眼，曾俊華笑言十足似紅包，佢話自己做咗快10年財政司長，每年揀顏色都唔容易，又要唔撞色，又要靚咁話。