數錯人數流錯會 秘書處道歉

【明報專訊】噚日立法會本來會喺財政司長曾俊華發表《2016/17年度財政預算案》後，下午3點繼續開會審議《版權條例（修訂）草案》，但會議開咗個多小時後，人民力量陳志全要求點人數，當傳召鐘聲過咗15分鐘，立法會主席曾鈺成指因法定人數不足35人，宣布流會。點知原來係秘書處「甩轆」數錯人數，當時在席議員係有35人！曾鈺成無奈地話根據《議事規則》，唔可以再喺今日召開會議，結果呢個蝦碌就令大家損失咗十幾個鐘去審議版權條例。


曾鈺成：會檢討點人數方法

其實秘書處並非第一次點錯人數，對上一次喺今個月初立法會大會流會時，當時秘書處一度話在席議員只有33名，及後翻查紀錄，發現工聯會麥美娟其實在席，不過，今次係首次因為數錯人數而錯誤宣布流會。曾鈺成都認為今次流會好可惜，會同秘書處一齊檢討現行嘅點算人數方法，避免再有類似事件發生。


曾鈺成話，現時利用一套程式點算人數，由兩名秘書處同事負責，議員一出一入都會數，屏幕會即時顯示當時嘅在席人數。當宣布流會後，會再次逐個議員核對，有需要時會查詢議員本人。


立法會秘書長陳維安噚晚向議員發信，話就點算人數出現誤差，代表秘書處向全體議員深表歉意。


大嚿：有信心拉到4月

當宣布流會時，社民連梁國雄開心到舉起勝利手勢，人民力量陳偉業都話，家好有信心可以拉布拉到4月預算案恢復二讀嘅時候。本身係版權條例法案委員會主席嘅民建聯陳鑑林話，係咪抽起版權條例由政府決定，但覺得如果抽起會招來惡果，因為日後議員就可以用拉布、點人數流會等方式逼政府讓步。