8月約滿嶺大 陳雲fb留言「搬空書籍 預備撤離」

【明報專訊】被本土派人士稱為「國師」嘅嶺南大學中文系助理教授陳雲，前日喺facebook話「已經搬空書籍，預備撤離嶺大」，又引用《聖經》金句，「如果有人不接受你們，也不聽你們的話語，你們離開那家那城時，要把腳上的塵土跺掉」。Emily翻查紀錄，發現佢同大學簽嘅合約喺今年8月先到期，但未聯絡到陳雲，未知佢係咪提早離校。


引《聖經》「要把腳上塵土跺掉」

Emily向嶺大求證，但校方話個別教職員嘅僱用事宜，涉及佢哋嘅私隱，不便評論。


原名陳雲根嘅陳雲，近年經常現身社運、出書，發表反共、反政府言論，佢上年3月收到校長鄭國漢嘅警告信，話佢嘅言論與學者身分相違，超出言論自由底線，違反大學教授應有基本操守，又叫陳要謹言慎行，回歸教學及學術研究，否則後果自負。即使收到警告信，但「國師」都不改敢言本色，不時批評中共總書記習近平，喺facebook度叫佢「上吊」、「買定棺材」等。