田北俊：後生十年或選特首 讚林鄭財爺處理本土問題唔錯

【明報專訊】特首跑馬仔已經暗暗展開，自由黨榮譽主席田北俊（田少）向來人氣高漲，唔少人都笑言田少應該考慮選特首。噚日田北俊就仿效立法會主席曾鈺成講法，話「後生十年啦」。佢又笑言，自己孫仔都覺得好辛苦，何况係一班年輕人？


至於其他黑馬，一向講法係「Anyone but CY」（除咗梁振英之外邊個都得）嘅田少就評價，政務司長林鄭月娥同財爺曾俊華都幾好，兩人處理本土問題唔錯。


立法會選戰將近，唔少人都關心田北俊9月嘅落腳點。田少噚日孖住東區區議員李鎮強同傳媒團拜，佢話理想嘅話，係自己喺立法會轉戰港島，由後生仔接班新界東。


佢又希望派新人開拓新界西同九龍西，加埋功能組別，共奪7至8席。不過，咁嘅宏圖大計會唔會太進取？田少就話，自由黨做「中堅中立」政黨，要有實力先可以作為籌碼同政府談判。至於可唔可以做到呢個中間橋樑，就要視乎社會係咪支持喇。


望譚耀宗接立會主席

對於下屆立法會主席嘅席位，田少就希望民建聯譚耀宗留低接任。對於傳出經民聯梁君彥係人選之一，佢就不點名話，功能組別議員做主席始終無公信力，泛民都唔會收貨。