與漫畫「真城最高」相似 請人海報涉抄襲 之鋒道歉

【明報專訊】黃之鋒、周庭同黎汶洛等學民思潮成員正在籌組政黨，積極考慮派人參加今年嘅立法會選舉。黃之鋒噚日喺facebook公開招聘平面設計師，負責新政黨嘅文宣設計工作。點知招聘海報上嘅人物圖案，被眼利網民發現同漫畫《爆漫》NDS遊戲中嘅主角「真城最高」造型極為相似，質疑海報抄襲。黃之鋒後來認衰，向公眾致歉，話海報無明確引用圖像出處，造成誤會，會收回有問題嘅海報。


fb專頁「中二萌團—不負責動漫亂評」噚日貼出新政黨嘅招聘海報人物圖案，對比《爆漫》「真城最高」嘅造型，指兩者嘅髮型、姿勢同輪廓都極為相似。


原想表達招聘設計師信息

黃之鋒話，海報原意係希望將「真城最高」嘅漫畫鋼筆，換成電腦繪圖用筆，表達招聘平面設計師嘅信息，同時向知道「真城最高」呢個人物嘅朋友開個玩笑。