通立會天橋啟用 曾鈺成：欣慰無超支

【明報專訊】以後落雨天市民去立法會大樓未必要淋雨，因為被立法會主席曾鈺成形容為「唯一一條可以由金鐘地鐵站交通樞紐，直通立法會的有上蓋無障礙通道」，已經喺噚日啟用。曾鈺成話天橋原定去年8月完成，但由於2014年底嘅佔領運動，以及後來天橋嘅鋼製簷篷傾斜，令到工程延誤，「但好欣慰無超支」，整個工程嘅造價約7430萬。


曾鈺成噚日聯同多名議員一齊主持天橋嘅啟用儀式。現時天橋嘅開放時間係逢星期一至星期六，早上7點至晚上10點。輪椅使用者、議員訪客同立法會工作人員可以直接喺天橋入口進入立法會大樓。不過，一般公眾仍需要到地面嘅公眾入口，先經過安檢，先可進入大樓。


立法會曾經出現衝擊大樓事件，曾鈺成話行管會已經考慮過遇到示威時點樣應變，將來若出現大批人結集，或群眾情緒高漲，天橋上設咗兩道鐵閘，有需要時可以關閉。