有話說﹕文字演變趨簡 也要守住精粹

【明報專訊】跟一班同學仔媽咪飲茶，總有傾不完嘅仔女經。早排，大家講TSA講到咬牙切齒，最近話題又轉咗去教育局提倡學生學簡體字呢件事，好多媽咪都講到鬼死咁激動，仲話喺上星期課程發展議會公眾諮詢期完結前，已經發出電郵表達強烈不滿，叫教育局放過香港學生咁話！


身為家長，Mama當然擔心，仲好驚一對中文科成績已經唔多標青嘅仔女，會愈搞愈亂。不過，沙田培英中學副校長兼中文科主任陳得南就叫Mama先冷靜，唔好太敏感，事關佢睇過整份諮詢文件，其實涵蓋範圍好大，並非單一討論簡體字呢個議題；况且若純粹要求學生「認讀」簡體字，而唔係只准學簡體字的話，佢個人認為問題不大。


老師：要認讀簡體 初中時機較好

從漢字演變發展嘅角度嚟睇，陳老師同意，從古到今，文字都係由繁轉簡，正如篆書變隸書、隸書變楷書，目的都係希望方便書寫，加快書寫速度。但佢強調，簡化嘅同時，唔應該失卻文字嘅本意。


陳老師指出，繁體字嘅精粹，在於表形、表音、表義，意思係依形辨義，辨形知音。例如「愛」字，「愛」字就係用「心」去感「受」；反之，簡體字將「愛」字寫成「愛」，愛得沒有「心」，仲係咪愛呢？簡體字嘅弊處，就係往往將文字要傳遞嘅重要意思都省卻埋，失卻咗文化內涵。


講到文字演變，陳老師話，要有一個好漫長嘅過程，所以，佢都唔贊成新一代只學簡體字，因為如果佢哋唔認識繁體字，喺閱讀古典書籍時，會遇到好大困難，呢個係關乎到文化傳承嘅問題，中華民族每一員，都應該有責任守護住，唔好畀文化斷層出現。


之不過講番轉頭，如果出發點只係畀學生有「認讀」簡體字嘅能力，佢就認為唔需要太過抗拒，但都唔建議係小學階段推行，因為小學生連繁體字都未掌握得好，又要普教中，再教埋簡體字，好容易令佢哋產生混亂。


陳老師認為，中二、中三係一個合適時機，因為去到呢個年紀，同學仔應該對繁體字嘅部首、筆畫、筆順有一定掌握程度，呢個時候，佢哋寫嘢比較多，可能想寫快啲，又或者有需要閱讀多啲內地書籍，為配合佢哋嘅學習進程而去教簡體字，咁就變得合情合理。


原來沙田培英中學中三級嘅中文科，都有撥出少少時間讓學生了解一下簡體字嘅造字原則，但就唔會花好多時間去教，亦不設考試。陳老師話，其實香港學生要「認讀」簡體字並唔困難，好快就學識。