長毛退位 吳文遠任社民連主席

【明報專訊】社民連噚日舉行周年大會，選出新一屆領導層，立法會議員梁國雄（長毛）就退位讓賢，主席一職交由吳文遠接棒，而黃浩銘就成為外務副主席，曾經用雞蛋掟中財政司長曾俊華嘅陳德章，就做內務副主席，長毛就改任行政委員。長毛講明日後唔會回應社民連嘅事，全部交由新主席做回應。


致力打破「一人政黨」印象

雖然長毛喺黨內無做領導層，但就未必會「裸退」，該黨噚日通過9月立法會選舉嘅初步推薦名單，長毛仍榜上有名。社民連噚日通過推薦4人名單，包括長毛、吳文遠、黃浩銘同陳德章，名單並無指明4人會出選邊區，相信要到6、7月先有最後決定，吳文遠話參選名單仲要睇吓政治局勢、黨內資源等再作調整。而過去參選立法會屢敗屢戰嘅阿牛曾健成，今次就無喺參選名單上喇。


社民連話，該黨成立接近10年，今次係首次由黨內成長嘅年輕黨員擔任行政委員會主要職位，過去社會關注社民連，往往聚焦喺長毛身上，佢哋會致力打破呢個印象，等大家知道社民連唔係一人政黨咁話。