田二少企足全程捧娜姐 第二日晨早上電台

【明報專訊】樂壇天后麥當娜第一次來港開騷，新民黨田北辰前晚都去捧場，雖然演唱會遲咗開場，但田二少話娜姐唱足兩個鐘，全場high爆。田二少雖然已65歲，但都睇得好投入，話同其他觀眾一樣企足全程，仲話唔知係咪演唱會「太正、太high、太興奮」，佢噚日一早就醒咗，仲去咗電台做訪問。


倡新設計巴士增護欄

田二少喺facebook話，原本噚日朝接受港台電話訪問，講番九巴乘客撞爆巴士玻璃事件，但既然早咗起身，咁不如親身去電台拜年，佢就一路講住電話一邊去電台，喺電台節目期間走咗入直播室，連節目主持人都嚇一跳。講番巴士事件，佢已經向巴士公司建議，喺近車門位置增設扶手，同埋喺新式設計嘅巴士車門加設類似窗花嘅護欄，防止乘客撞爆玻璃跌出車。