剪布有力 陳健波新花名「重力波」

【明報專訊】如果唔係因為立法會拉布，大家都唔會發現，原來財委會主席、保險界議員陳健波計仔多多，創意十足。佢早排為咗抗拉布，提出搞「抗拉布工作區」。為咗解決財會大塞車，之前又建議財會「雙軌制」，即分開兩個會議時段，分別處理爭議同無爭議嘅撥款項目。


新年期間，波哥都心掛呢個提議，噚日喺傳媒茶敘透露，已尋求過法律顧問意見，對方都話雙軌制無問題。早兩日佢又積極同政府做功課，但政府就話要審議埋高鐵再諗。波哥話，政府有三大擔心，例如「咩嘢有爭議、咩嘢係無爭議，可能都有一番爭議」，建制派亦會覺得呢個做法如同向泛民跪低。佢自己就認為值得一試，因為排緊隊嘅議案若果今屆立法會唔能夠審議，9月就要全部推倒重來。


可能因為波哥最近頻頻出招，同泛民交戰，連「六散人」召集人廖長江都大爆，波哥最近有個新花名「重力波」，似乎同事都好欣賞波哥「剪布」威力。