「旺角暴亂」成新春酒會熱話

【明報專訊】近日有唔少團體舉辦新春團拜、酒會，過去酒會都喜氣洋洋，但今年大年初二旺角發生大衝突，唔少出席官員、團體代表發言時都要提吓事件，好似噚日政務司長林鄭月娥出席福建社團聯會團拜時，就話香港有「非常優秀嘅警隊」，叫在場人士畀啲掌聲佢哋，支持佢哋工作。


林鄭又話，過去一兩年見到有小部分人不斷破壞香港和諧，令政府無法更好施政，喺立法會又被部分議員拖延政府工作，佢呼籲福建鄉親發聲，話畀議員知有好多事要做喎。而福建社團聯會主席吳良好致辭時，就批評旺角「暴亂」嚴重破壞社會安寧，要予以最嚴厲譴責，強調唔可以姑息「暴徒胡作非為，搞亂香港」。


吳良好又話要做好地區工作，表明喺月底新東補選、9月立法會選舉時，都會發動、組織鄉親，全力支持愛國愛港候選人，「將禍港政黨政團踢出立法會」。


藍鴻震﹕潮州人最本土

而喺潮州商會嘅團拜，民政事務局前局長藍鴻震就話，示威者講本土，其實潮州人就最本土，話商會喺香港已有近100年，潮州人喺中國更有逾千年，所以講本土，潮州人已成功帶領香港喎。