有話說﹕要為正邪定分界

【明報專訊】Mama雖然係師奶仔一名，但都好關心時事，亦好鼓勵細路哥多睇新聞，唔想佢哋淨係掛住讀書，完全唔知周圍發生緊乜嘢事。陪小朋友睇新聞，發現佢哋好鍾意問三個問題﹕「發生乜事？」、「點解會咁？」、「邊個啱邊個錯？」


換着早幾年，Mama三言兩語就可以將一單新聞解釋得清清楚楚，不過，近年就覺得難度愈來愈高，皆因社會對立氣氛愈來愈濃厚，抗爭手法亦愈來愈激進。就好似大年初一旺角街頭嘅暴力衝突，唔單止細路哥睇到目瞪口呆，Mama解畫亦解到口窒窒，事關冰封三尺，非一日之寒，成件事牽涉太多因由，好複雜，真係好難一下子為正邪定分界。


毋須隱瞞家長立場

Mama解唔掂，唯有請教高人。資深通識科老師許承恩就認為，家長有立場無問題，唔需要喺小朋友面前隱瞞，之不過同意某方嘅立場，唔代表要認同晒佢哋所有嘅行為，做得極端過火，一樣要指出問題所在，或者叫小朋友設身處地諗諗，有冇其他更好嘅方法替代，總之唔能夠含糊其辭，要幫小朋友分辨是非黑白，從小建立正確價值觀。


許sir建議，家長不妨將一件事拉闊啲嚟睇，借機同細路哥分析下，點解極端建制派跟極端本土派嘅思想模式，會有咁大分歧，可能係同佢哋成長背景有關。例如前者有部分人，可能喺大陸長大，甚至經歷過文革，所以佢哋好怕動盪，一心只求社會安定繁榮，其他乜都唔重要；後者有部分可能係N無人士，佢哋覺得社會有好多不公義，一定要起嚟抗爭，對抗權貴。家長從多角度幫助小朋友了解各個階層嘅人，亦有利佢哋他日跟唔同立場嘅人溝通。


講開近年嘅示威衝擊新聞，許sir話，其實係傳媒教育嘅好題材。大小朋友都要抱住一種想法，就係新聞畫面只係事實嘅一部分，而唔係事實嘅全部。我哋睇到嘅新聞畫面，係經過新聞機構篩選後先出街，換句話說，背後有更多場面，係觀眾、讀者睇唔到嘅，所以，要全面啲了解一件事，就要睇多幾個電視台、睇多幾份報紙喇！


佢又提醒Mama，細路哥多睇新聞係好事，但唔好一味只留意本港新聞，應該將目光放遠少少，家全球究竟關注緊乜嘢呢？其實有好多，包括美國即將舉行新一屆總統選舉、寨卡病毒肆虐全球，呢啲新聞，小朋友都應該要知。聽過許sir這番話，Mama確實學到唔少嘢，亦即時聯想到好多「新聞經」，可以同仔女慢慢傾。