唔記得情人節 Ann姐老公當眾吻妻

【明報專訊】噚日係初七人日兼情人節，民建聯立法會議員蔣麗芸（Ann姐）邀請傳媒去佢屋企拜年，佢老公梁海明在場，席間大家問到情人節有乜準備，兩公婆都話唔記得噚日係情人節，話連禮物都無買，而梁海明就即場錫咗Ann姐面珠一啖當送禮。不過兩人表達愛意唔夠慷慨，大家叫佢哋encore，兩人拒絕，話睇唔到嘅人機會已錯失咁話。


「繁體字係畫」 反對教簡體字

唔知大家仲記唔記得Ann姐上年同傳媒聚會時開埋屋企卡拉OK大展歌喉；今年再有人叫佢開金口，Ann姐立即播番佢20幾年前都上過無綫節目獻唱嘅片段，然後跟住唱，證明自己仍然好唱得。


對於大年初一晚旺角大衝突，近日有政界人士話要就《基本法》23條立法，Ann姐就話呢樣留番政府自己決定，但做就要預咗社會一定有反響。至於近日對係咪要教學生簡體字，同樣惹爭議，Ann姐就表明反對，佢話覺得每個繁體字都係一幅畫，要教都一定係教繁體字咁話。