鄉事組新界黨 「唐三藏未齊人」 侯志強自比悟空：主席必係劉業強

【明報專訊】鄉事派組織新界黨近日甚囂塵上，仲傳到主席人選都篤定由鄉議局主席劉業強（發仔）兼任。劉皇發個仔劉業強噚日喺沙田馬場鄉議局90周年盃賽馬活動時就話，新界人都係時候組織自己嘅「馬房」，但就講笑話唐三藏家未齊人，要搵多啲人參加。新界黨馬房有咩人腳，發仔就賣關子，但講到揀馬，佢似乎都有料到，早早就同大家講，鄉議局盃賽事睇好1號馬「華恩庭」，結果真係畀佢貼中頭馬。


劉業強：新界人應有自己馬房

講到組黨，上水鄉事委員主席侯志強講到似層層，仲話最快可能一個月內有公布，又話主席實係劉業強做啦，而佢自己最多只做孫悟空，出嚟幫手擋吓箭喎。


發仔就澄清，新界黨仍然處於籌組階段，邊有咁快有主席同班底人選呀。不過，佢話唔少鄉民都覺得新界人應該有自己馬房。至於中聯辦點睇佢哋另起爐灶，發仔都好坦白話，中聯辦有陳述正反意見，亦好關心新界黨想企乜嘢定位。發仔話中聯辦對佢哋組織持中立態度，但唔少人都關心，佢哋如果喺立法會選舉出選，會拉散建制派選票。不過，佢就有信心可以開發新界新票源。


發仔又話，有啲政黨，好似佢所屬嘅經民聯，好支持組新界黨。咁民建聯呢？發仔就笑而不語。發仔仲同傳媒行家講笑話，叫記者組黨，咁就可以名副其實叫「新聞黨」！