中大為「近日事件」取消春茗 沈祖堯﹕太多唔開心嘅事

【明報專訊】農曆新年後，各大院校陸續搞春茗，以往院校搞春茗，校長、副校長同學校高層都會現身同傳媒拜年，講吓學校新發展，但Emily噚日突然收到中文大學通知，取消下星期一（15號）嘅傳媒新春茶敘，話鑑於「近日發生的事件」，即係旺角衝突，校方認為現時唔適合搞新春茶敘慶祝新春。


大年初一深夜到年初二早上嘅旺角衝突，拉咗唔少學生，包括學民思潮成員林淳軒等兩個中大生，中大前日先出聲明譴責所有暴力行為，話對於多人受傷感到痛心。


學生會fb問沈「還會關心學生？」

中大學生會同日喺facebook向校長沈祖堯發問﹕「今天的沈祖堯，還會關心學生嗎？」學生會又話，仲記得沈祖堯曾經講過，視學生如子女，無論子女有沒有犯錯都會出手相救。


Emily噚日問過中大校長沈祖堯點解唔搞春茗，佢就只係話因為近日發生太多唔開心嘅事，加上有好多事要處理，所以取消茶敘。


至於同樣有學生被捕嘅港大會唔會又取消茶敘呢？Emily了解過，港大暫繼續安排喺2月25日搞春茗，冇取消到。