張華峰：自己助理班底「強過政府」

【明報專訊】經民聯金融界議員張華峰（圓圖）噚日同傳媒團拜，經過近4年喺議會嘅洗禮，張華峰「耍太極」嘅功力已到達大師級，面對十幾個記者用唔同方式追問支唔支持特首梁振英連任，佢都好小心回答，話要視乎民意。佢亦有提到梁振英有心為香港做事，但班底唔好，仲話自己嘅助理班底「強過政府」。


張華峰又力撐經民聯主席梁君彥可以「噬」住泛民，可勝任下屆立法會主席，但同時覺得民建聯譚耀宗都適合，至於個人撐邊個，佢話「黨性決定」。


另外，每年過年都係議員落區寫揮春冧街坊嘅好時機，民建聯葛珮帆（EQ）更苦練多年，自創特色「肥版」福字揮春。不過EQ同傳媒聚會時大呻，以往每年可寫到近5000張，但今年揮春產量驟減，皆因拉布令佢被困議事廳，仲話激氣係自己因為被困而取消幾場落區寫揮春，但上facebook就見到新民主同盟范國威上載自己寫揮春嘅相，直斥呢啲可能係泛民嘅選舉策略。


旺角衝突後，EQ同建制派都有去醫院探受傷警員，不過建制派一行10人拉大隊迫爆病房嘅相就被網民揶揄做騷，又質疑超過探病人數上限。EQ話醫院有幫佢哋特別安排，又話受傷嘅黃sir見到咁多人探佢其實好開心，噚日做完手術，仲WhatsApp叫大家唔使擔心。