黑莓新搞作 Touch Screen支援中文手寫

【明報專訊】近排出街食飯，小琴成班朋友都唔多講野，個個拎實部「新玩具」iPhone、iPad玩，「蘋果狂潮」有幾勁，真係唔使多講，仲搞到各大手機品牌管理層頭都大埋，唔知有咩對策，好似諾基亞就連CEO都炒埋，相對起傳統品牌，以黑莓機打出名堂嘅Research in Motion（RIM）都算喺商業客市場企硬。

或再推出全觸控電話

話雖如此，黑莓噚日亦變招推出又有招牌鍵盤，又有Touch Screen嘅Torch 9800手機，用上全新黑莓6操作系統，更係首次支援中文手寫嘅黑莓機，月尾係香港就會有得賣。RIM亞太區副總裁勞偉強話，呢部手機觸控非常流暢，未來都唔排除繼去年嘅Storm系列後，再推出部全觸控黑莓電話。

勞偉強講，黑莓機一向喺商用市場站得着腳，但去到一般消費市場就弱咗少少。無他嘅，Android、iPhoneOS嘅Apps（應用程式）比起黑莓機多好多。勞偉強話，好多人都覺得黑莓好商業，所以就無咁有興趣開發黑莓平台嘅遊戲，以後RIM都有打算同香港嘅遊戲開發商多啲合作，推出唔同嘅Apps。RIM下年推出嘅Playbook平面電腦，勞偉強話呢部Playbook會貫徹專業功能，對商業客來講，可以堪稱完美，而且Playbook用雙核處理器，遊戲方面亦唔會輸蝕，一眾黑莓迷下年可能要買「新玩具」喇。