湯文亮﹕我也是爛頭卒

【明報專訊】年尾流流，索老不斷話要沽空人民幣，又唱衰中國，於是我撰文話，索老以86歲高齡，仍然要身先士卒，有點坎坷，因為這隻不是過河卒，而是爛頭卒，講明沽空人民幣，以及唱衰中國，其他有名望資產管理主持人又點會做，就算沽空人民幣都唔會公開講，當年江總教落，悶聲發大財，做生意的人一定懂得，索老冇理由咁失策。


有老友話我有口話人，冇口話自己，我也曾是爛頭卒，唔使佢講我都知道，去年大約這個時候，我發表了「細價樓爆煲論」，表示細價樓將會在6個月內爆煲，誰不知在6個月後，細價樓連些少爆煲的迹象也沒有。


只做一次 下不為例

我當時接受傳媒訪問，很多傳媒人都問，點解只有我講爆煲，其他資深投資者隻字不提，唔通他們睇唔到細價樓會爆煲，我話，全部投資者都睇到，甚至比我更清楚，不過，冇人願意做爛頭卒，在細價樓牛氣冲天時講爆煲，這樣愚蠢的事冇幾多人會做，尤其是沒有着數，我亦只此一次，下不為例。


昨日我睇《明報》，有資深投資者話早在兩年前已經感覺到樓價不合理，不過，他當時並沒有公開說出來，亦沒有勸喻年輕人暫時不要上車，就憑這一句話，任何人都知道我的功力不夠。唔將事實講出來，便不會得失地產商、物業代理，至於年輕人一定要迫上車，即使樓價下跌，他們遭受損失，亦只不過他們為自己的行為負責，最蠢的就是將事實講出來的人。


年輕人買貴樓 後果自負

其實，我都唔想講，如果有一位資深投資者叫年輕人小心考慮細價樓樓價是否太昂貴，我一定不會插嘴，在發表之前，我亦曾考慮過，如果我唔講，他日細價樓急跌，遭受損失的年輕人就會指摘物業投資者不提醒他們，我當時見冇人肯講，唯有免為其難做這隻爛頭卒。


紀惠集團行政總裁

[湯文亮 敢說亮話]