新聞類別
副刊
詳情#
【明報專訊】工聯會維園攤位噚日正式開幕，為工聯職安健協會義賣籌款，主要賣福袋、風車等。工聯會會長林淑儀、工聯會理事長吳秋北等主持開幕，其間學民思潮嘅周庭同黎汶洛就分別手持數碼暴龍公仔及100毛嘅「麒麟怪」出現，黎汶洛大叫「支持全民退休保障、停建高鐵、停建大白象工程」。
遇到兩人突襲，林淑儀就一邊影相一邊話「支持退休保障」，吳秋北寫揮春時就寫「歲歲平安撐退保、家家和睦要標時」。不過，去到工聯會眾人企喺攤位外大合照環節，黎汶洛繼續喺旁邊叫口號，一班工聯會理事就同佢講「你出夠鏡啦，表演夠啦，你返屋企啦」，更有理事同黎汶洛有小推撞。
Emily好奇點解周庭同黎汶洛咁突然出現喺工聯會攤位嘅開幕禮。黎汶洛就解釋，佢喺100毛度買咗隻「麒麟怪」，打算送畀喺工聯會攤位對面嘅新民黨葉劉淑儀，點知見唔到葉劉，就見到吳秋北，叫吓口號，表達自己對吳秋北平時立場不定嘅不滿。周庭就話，「真係咁啱，我唔會拎住隻數碼暴龍公仔嚟突擊。」
留言 (0)
