黑白宣傳品 擁躉嫌唔吉利 新思維由黑變綠花3萬

【明報專訊】新東補選2．28舉行，各候選人都各師各法宣傳拉票，但新思維就遭遇小挫折，話要急換宣傳策略。主席狄志遠噚日講，早前黑白格調嘅宣傳品引來唔少支持者投訴，話新年流流認真唔吉利，連阿狄都話試過喺晚黑見到橫額，都感到「有少少咩」。查實新思維之前以「苦瓜」作主題，係希望有「意境層次」，當時大家都讚好，點知出街後口碑唔好，阿狄坦言「太創新，成熟啲嘅選民接受唔到」。


新思維當機立斷，決定噚日起立即更換所有橫額，以鮮綠色嘅宣傳品取代，相信要花3萬蚊，都咪話唔肉赤。今次嘅口號都會易明啲，直接解釋「第三路線」，即「願意傾、講道理、找答案」。


其餘候選人都唔敢懈怠，民建聯周浩鼎噚日喺北區連走多場同選民握手；公民黨楊岳橋就喺將軍澳擺年宵攤檔兼宣傳。報名新東補選嘅仲有本土民主前線梁天琦，獨立方國珊、梁思豪及劉志成。