最離譜消費新聞 護老院虐老當選

【明報專訊】消費者委員會噚日公布由近4000名市民投票選出嘅「羊年十大消費新聞」。本報舊年揭發大埔劍橋護老院虐老，逼長者喺天台除晒衫等冲涼，唔單止以八成半得票率成為十大新聞之首，更被選為最離譜消費新聞。消委會認為，結果反映市民對維護長者人權、私隱同尊嚴嘅關注。


另外，翠湖花園天價維修圍標案嘅判頭認行賄，獲選最大快人心消費新聞；講到最抵讚，就當然係《競爭條例》生效啦，買嘢都抵啲嘛！

不良營商手法、新興消費模式同食物安全都受市民關注，其餘九大新聞包括連鎖家俬集團DSC德爾斯全線結業，顧客投訴收唔到貨；加工肉被世衛列為致癌物；「殭屍肉」在港中轉走私內地；及多人進食洪瑞珍三文治食物中毒等。其中7間銀行非接觸式信用卡嘅用戶資料易被讀取，佔第7位，消委會認為雖電子錢包喺香港未算普及，但大家都關心個人資料保安問題，未來會留意新科技下消費者保障。