叫慢必「基佬全」 保港運動成員惹混戰

【明報專訊】港台節目《城市論壇》不時出現台上台下都爭論嘅情况，噚日討論拉布，人民力量立法會議員陳志全（慢必）做嘉賓，人力亦有大批支持者到場，節目原本都算秩序良好，但有保衛香港運動嘅成員（圖），拎起咪發言時突然呼籲大家9月選舉時要踢走「基佬全」，明顯人身攻擊慢必嘅性取向，搞到台下即時大亂。


主持蘇敬恆其實都執得好嚴，台下觀眾一講「賤格」、「民建聯最無恥」呢啲說話，佢都會即時喝止，強調節目唔接受任何人身攻擊嘅說話。保衛香港運動成員發言，原本都係表達反拉布，但最後一句「基佬全」，就令在場人力支持者起哄，雙方更喺台下互相掟嘢，令台上講者發言都有少少受到干擾。


做過立法局主席嘅嘉賓黃宏發睇唔過眼，教育蘇敬恆應要主持好論壇，仲提議佢企起身控制秩序，最終喺廣告時段，蘇敬恆嚴正警告在場觀眾唔可以再掟嘢同人身攻擊，否則立即趕人離場，先令眾人稍為靜少少。