知港人口味 Netflix：新劇將講英女王

【明報專訊】網絡電視Netflix進軍香港已大半個月，首席傳訊總監Jonathan Friedland噚日「旋風式」襲港，同傳媒傾吓偈。Jonathan話，香港人最鍾意Netflix自家劇集，例如漫威英雄系列Jessica Jones同刻劃毒梟故事嘅NARCOS。雖然受歡迎劇集《紙牌屋》因版權問題仲未有得睇，但嚟緊會有以英女王伊利沙白二世為藍本嘅新劇The Crown，料今年內全球同步上映，食正港人口味。


中文電話查詢駁去星洲

Netflix暫時只有兩個客戶服務中心，打電話問問題揀中文就會駁咗去新加坡嘅中心。Netflix方面提到，港人提問多數係點先睇到4K節目，或註冊時打錯電郵地址點算好；試過有接線生只識講普通話，港人照講廣東話，竟然溝通得到。


Netflix其實有意進軍內地市場，但仲有細節要傾，例如要搵可靠嘅合作伙伴。


搭車煲劇最驚「爆data」，Jonathan話，無計劃提供離線收看功能，因未來流動網絡發展趨勢必然愈嚟愈穩定同收費平。如果巿民喺街上想煲劇，佢建議大家去連鎖咖啡店試吓，Netflix會根據網速調節畫質，網速慢嘅地方都唔使擔心。