高唱「是誰令青山也變」 侯志強組黨：一季要吸萬人

【明報專訊】新界原居民「套丁」近期引起社會爭議，加上鄉事派同民建聯嘅不和浮面，上水鄉事委員會主席侯志強早前喺鄉議局會議上，就話要搞番個「新界進步聯盟黨」，維護新界人權益。侯志強噚日向Emily透露，「新進聯」目標係一季內招攬5位數字嘅會員，而今日27個鄉正、副主席就會商討架構同黨章。


數數手指，第一大黨民建聯現時會員數目都係得大約3萬人，如果新進聯招收黨員嘅速度真係如侯志強所講咁快，唔知一年內可唔可以成為全港最大黨呢？

侯志強噚日去港台錄影新一季《頭條新聞》，節目中佢高歌仙杜拉嘅《風雲》，高唱「是誰令青山也變，變了俗氣的嘴臉」，至於形容緊邊個，就看君判斷。


侯志強話，組黨係因為新界人一定要幫自己發聲，靠人把口嘅話「畀你食都食唔到落肚」，又話自己係支持正義同中立。


不過，侯志強話自己唔係新進聯嘅「揸fit人」，只係召集人，又同Emily講自己喺新進聯只會做「卒仔」，負責傳遞吓信息。至於黨主席一職，佢相信都係由鄉議局主席劉業強或副主席張學明其中一人出任。


田北俊戴豬隊友面具高歌

而一齊出席《頭條新聞》嘅自由黨田北俊，喺節目度就戴住豬隊友面具，高唱佢嘅飲歌《舊歡如夢》，佢話以前做保皇黨建制派好容易，但家政府做嘅嘢就好難撐喇。