謝偉俊劉慧卿訪緬甸見議員

【明報專訊】呢排立法會為咗審議版權修訂條例草案，泛民不時點人數，搞到建制派好無癮，其間仲試過3次流會；不過無黨派嘅謝偉俊好威威咁講，3次流會佢都無份「促成」，佢次次都喺議事廳內，唔怪得佢仲笑得出。


近期唔少建制派見到泛民都有少少氣頂，但謝偉俊嚟緊仲要同民主黨主席劉慧卿出trip，嘩，佢兩個有乜嘢要一齊外遊先？Emily問番，原來兩人獲聯合國邀請，會去訪問緬甸幾日，主要去見一見緬甸嘅議員，將香港做議員嘅方法、貼士傳授畀佢哋。


咁點解聯合國會睇中佢哋嘅？謝偉俊話，事緣係立法會前秘書長吳文華（Pauline）有份幫手呢個項目，早前佢推薦咗3個議員，除了劉、謝二人，仲有經民聯石禮謙，但可能後者要做港大校委，近排港大又係多事之秋，結果只有劉、謝二人答應。唔知佢哋傳授畀緬甸議員嘅貼士有無分別？包唔包括點應對拉布呢？