罕見海豚誤闖香港水域

【明報專訊】本港水域不時有稀客訪港，今次係一條罕見嘅熱帶斑點海豚（Pantropical spotted dolphin），佢前日闖入本港水域後，一直喺屯門黃金海岸徘徊，唔知係咪樂而忘返定係迷路，至噚日傍晚仲未離去。


熱帶斑點海豚華南少見

香港海豚保育學會會長洪家耀話，前日下午接獲市民報料，話黃金海岸對出有條小海豚游弋，該會派員到場，確認係一條熱帶斑點海豚，身長約1米，香港以至南中國水域都比較少見，對上兩次分別於1996年喺港島南區熨波洲及2000年喺大鵬灣內嘅沙頭角海沿岸，發現呢種海豚嘅屍體。


籲市民勿出海「追豚」

換言之，今次係首度有市民喺香港發現活生生嘅熱帶斑點海豚，洪家耀話條海豚好精靈，識得閃避駛過嘅船，又見到佢食魚，相信只係誤闖香港水域，玩厭咗自然離去，呼籲市民唔好出海「追豚」，驚對佢造成滋擾。漁護署亦喺前日接報小海豚訪港，連續兩日派員觀察佢嘅去向，又同海洋公園商討拯救方案，暫時未有決定。


熱帶斑點海豚身材修長而嬌小，成年身長約1.8米至2.6米，體重約120公斤，出生時無斑點，斑點隨住愈大個而愈來愈多。佢哋主要分佈於熱帶水域，具群居習性，一般群組約100條，常被發現與黃鰭吞拿魚一齊獵食，主要捕食魚類及甲殼類動物。