葉劉著皮草：同食牛一樣 關注動物團體批無知無恥

【明報專訊】近年唔少環團及動物團體已經批評皮草衣著，但向來著衫都有要求嘅新民黨主席葉劉淑儀，噚日就毫不忌諱，著住件好搶眼嘅紅色皮草大褸現身立法會，連無黨派嘅黃毓民見到葉太，都忍唔住講「葉太，你著mink（貂皮）呀」。葉太亦樂於介紹件皮草，話件衫係佢十幾年前做局長時，有一次去只得零下廿幾度嘅哈爾濱睇冰雕時買嘅。


話來自養殖嘅mink

葉太仲喜滋滋，話呢件皮草係意大利設計、廣州製造，係國貨嚟嘅，佢仲即場除低件皮草，騷個寫住「雪兒」嘅名牌畀記者睇，以示佢真係著國貨，又話十幾年前買都要1萬幾蚊人民幣。不過，葉太就話，皮草來自養殖嘅mink，又形容著皮草其實「同食牛肉一樣」！


葉太以往都關注動物權益，例如有關注寵物遺棄等問題。不過，非牟利獸醫診所執行主席麥志豪係facebook反駁葉太，話食牛並唔值得驕傲，也不值得鼓勵，而穿皮草比食牛殘酷何止一千倍。「身為立法會議員可以如此無知、無恥。實在叫人驚訝。」麥志豪又話葉太將穿皮草嘅「不道德行為合理化，不單止傷害了動物，也傷害了我們公民社會的質素！」


梁美芬講環保唔買皮草

葉太的牛肉論，有議員聽到都表嘆息。經民聯梁美芬就話佢唔會買皮草，對於葉太嘅做法，梁就擰晒頭，話自己多年來係環保促進會主席，佢嘅環保立場好清楚，話自己近年盡量穿棉質及羊毛衣物保暖。