玩退休遊戲 劉鳴煒「晚年餐搵餐食」

【明報專訊】青年事務委員會主席、華人置業主席劉鳴煒最近榮升新一代「男神」，成為網絡紅人。智經研究中心噚日推出有關退保研究報告，擔任智經副主席嘅劉鳴煒就現場教路，點樣先有優質嘅退休「package」。為咗令形式更活潑，劉鳴煒特別叫同事設計咗「想做大富翁？定食西北風？」嘅網上遊戲，畀大家輸入收入等資料，計算一下自己未來退休生活情况。問題包括平時出行工具、過時過節想做咩、如果政府人人派9000元等。


劉鳴煒即場示範玩法，仲叫記者幫佢輸入各項問題答案，不過Emily就揀咗放假去日本旅行。早前明明話要少去日本、多啲儲錢嘅劉鳴煒顯得好無奈，笑言「我講咗話去少啲日本㗎喎！」最後經系統推算，劉鳴煒只能「淪落」到晚年「餐搵餐食餐餐清」。可能因為心有不甘，劉鳴煒補充話自己早前試玩過一次，但因為選擇保守好多，所以結果一定好過呢個。