陳啟宗﹕財爺選特首 機會「絕對冇」

【明報專訊】政界關注2017年特首選舉「跑馬仔」人選，被視為「頭號梁粉」嘅恒隆主席陳啟宗早前被問到，係咪會支持特首梁振英（CY）連任時，佢話「唔使問阿貴，答案好明顯」；陳啟宗噚日出席香港明天更好基金嘅傳媒茶叙，大家繼續關心呢件事，佢又以「畫公仔唔使畫出腸」回應，答案呼之欲出喇。至於其他黑馬嘅機會，例如梁錦松呢？陳笑笑口話「再睇」；但記者一提到財爺曾俊華，陳就一口否定，話﹕「絕對冇！」不過國家主席習近平都搵過財爺握手喎，仲唔係有機？陳啟宗就話，「我都有握過手啦！」


創科局長楊偉雄早前帶起「我見過」潮流，向來見多識廣嘅陳啟宗噚日都分享名人趣聞，大談「我見過」。佢提到自己上周同俄羅斯副總理德沃爾科維奇（Arkady Dvorkovich）對談，仲坐船去南丫島食海鮮。陳又向對方八卦總統普京為人，估唔到佢話「鐵漢」普京其實私下成日笑。


大談「我見過」中外名人

講到經濟環境，陳啟宗重提1998年金融風暴，話見過金融大鱷索羅斯，當時對方仲信誓旦旦話「一定贏唔到我」。點知前特首董建華夠膽同索羅斯對賭，並打到索羅斯落花流水，成功捍衛港元，陳大讚呢件事值得名留青史。有記者趁機追問，現屆政府有無能力與當年相比？陳啟宗就醒目喇，話「絕對有」，讚現屆班子個個都好。