「1．26係香港生日」 網民籲慶祝

【明報專訊】1997年之後，香港政府每年7月1日都搞慶回歸活動，10月1日就例必要賀國慶，大家習以為常之際，Emily噚日突然發現，有啲網民話噚日先至係香港生日，應該慶祝喎，原來網民指1841年1月26日，係英兵抵港登陸西環水坑口嘅日子，之後就佔領港島，話呢日係香港踏上開埠之路。


網民就贈興，話香港噚日係175周年生日，仲話澳洲都係同一日慶祝生日。網民係咪戀殖就好難講，但英國管治香港就確係事實。其實，大家想多知啲香港殖民歷史，除咗去博物館或睇書，去政府檔案處嘅網頁，都可以喺網上睇到好多香港早年殖民嘅資料，包括見到1841年5月1日香港政府第1號嘅憲報、1843年1月4日頒布嘅英王樞密院令等等。