中大候選內閣 爭取引入連鎖食店

【明報專訊】中文大學學生會今屆有兩個候選內閣競爭，呢兩個莊提出嘅建議，令唔少師兄師姐側目。先係候選內閣「煥然」前日因寒風襲港要求校方停課，繼而係「星火」（圖）宣傳，話會要求中大引入連鎖食店，包括麥當勞，引起網上唔少討論。


中大生向來好支持小店，但facebook專頁「中大選」就話，候選內閣「星火」前晚向同學宣傳，爭取引入如麥當勞、貢茶、譚仔等連鎖食店，有幹事仲話無理由「唔畀」連鎖店入中大，認為咁樣都係「另一種壟斷」！「星火」呢啲見解引起網上唔少批評，民權觀察成員沈偉男就話，中大一個令人自豪嘅地方就係無連鎖店，「別忘了其他大學就是被連鎖店攻陷，食物又唔好食」。


但「星火」候選內閣會長周竪峰就解釋，佢哋並唔係「倡議」要引入連鎖店，只係聽到同學有呢個訴求，先會為同學爭取。佢又認為歷屆學生會都「未審先判」，先會斷定「資本主義萬惡」而唔畀連鎖店進駐，「我哋立場由始至終都係以同學為本，係聽到好多同學反映想有啲連鎖店嘅選擇，例如話譚仔同貢茶」。對於網上嘅抨擊，佢就話好明白，「我明白佢哋有咗呢種value（價值觀）咁多年，但我都認為佢哋要睇番中大校園，大家實際所想嘅」。


但「星火」嘅言論激親好多師兄師姐，包括當年曾反對連鎖店進駐中大嘅區議員譚凱邦，佢話中大有多元嘅小店係得來不易，話好多間canteen都有「頹飯」，「係頹啲，但當冇咩錢時真係一個好選擇」。