有話說﹕小朋友聲稱被親人侵犯點算？

【明報專訊】呢排有啲關於小朋友嘅新聞，睇到Mama有啲疑惑，自己又喺度諗﹕如果有日小朋友同你講，他受到父嚏A或其他相熟親友性侵犯時，你會點處理？笑笑口耍咗佢? 定第一時間去報警呢？

開放式提問 切忌引導質詢

護苗基金社工曾美怡教Mama，佢話各位爸媽聽到呢啲事時，先要保持鎮定，仲有要相信小朋友，咁佢哋先會有勇氣繼續講落去，父母先可以對事件了解得更深入，然後再搵個安靜嘅地方，向孩子了解清楚。


Mama又諗，人仔細細嘅小朋友究竟明唔明發生乜事呢？曾美怡話家長可以用開放式問題問小朋友，例如﹕「邊個對你咁做？」、「呢個人對你做過啲乜？」；切忌問佢哋一啲引導性問題，好似「係唔係爸爸（或媽媽、其他親友）對你咁做？」，相反，應該畀小朋友自己講番件事。佢又話，當家長得到足夠嘅資料，若然對事件有懷疑，其實就已經可以即刻報警或向社工求助。


留意異常情緒行為與身體損傷

不過咁喎，現代資訊發達，年紀小小嘅細路仔，好多時對性知啲唔知啲，佢哋真係有受到侵犯，定係隨口講呢？點先知道佢哋所講嘅有幾成真幾成假呢？曾美怡話，家長可以根據小朋友嘅表徵去推斷，例如﹕受害者喺生理、心理同行為上會有異常表現。生理上，受害者可能會成日失眠同發噩夢；心理方面，可能受害者平時係好多嘢講嘅小朋友，但突然變到唔敢同某一個人獨處、接觸或者溝通，好怕同人有身體接觸；又可能會長期充滿內疚、憤怒同羞恥嘅情緒，咁樣家長就要即刻搵專業人士求助。


另外，佢又建議，當家長幫小朋友冲涼時，可以留意佢哋身上嘅私人部位有無損傷，如有，應即時帶佢哋去睇醫生，初步查清楚原因，再作進一步推斷。