CY訪露宿者 批阻建公屋者 網民：又係土地問題

【明報專訊】天寒地凍，政府都開放社區中心畀人避寒，特首梁振英（CY）前晚就去咗深水埗臨時避寒中心探望露宿者，事件本來平常不過，但CY一番言論又惹起爭議。CY喺facebook以露宿者無屋住為由，批評有人阻住政府起公屋，結果被網民鬧佢借露宿者「抽水」；有人仲乘機批評政府，成日喺天橋底同隧道射水洗街逼走露宿者，先至係搞到人哋無處容身。


CY前晚喺facebook上載避寒中心探訪相片，話同露宿者傾偈，話佢哋因為畀唔起牀位租金，大家都等住上公屋。CY抨擊有人阻住政府搵地建屋，「我今晚不禁想：反對建公屋的人大概要過來聽聽露宿者的心聲」。


CY嘅帖得到佢甄選嘅「朋友」讚好，包括教育局長吳克儉、青年事務委員會主席劉鳴煒等，有「朋友」亦留言話佢肯體察民情。


不過，CY嘅言論亦惹起唔少迴響，有網民勸佢「停止煽動群眾批鬥，勿再分化香港人」。有人鬧政府成日喺露宿者聚居嘅隧道洗地，趕絕佢哋，家CY就借佢哋嚟鬧人。 有人又話「689又乘機抽水……天氣嚴寒，又係土地問題！」有網民就實際啲，話如果新界東北發展嘅土地全部用嚟建公屋，佢又唔反對喎。