「我見過」成金句 遭市民抽水 楊偉雄：港人創意表現

【明報專訊】見過Steve Jobs（美國蘋果公司創辦人喬布斯）嘅創新及科技局長楊偉雄，日前講過嘅「有邊個見過Steve Jobs？未呀？我見過！我真係見過！」成為金句，引嚟網民、藝人以至慈善機構紛紛批評同「抽水」。楊偉雄噚日接受無綫電視節目《講清講楚》訪問時，就回應呢股網上熱話，話欣賞大家將金句發揚光大，又讚香港人將呢幾句說話發揮得淋漓盡致，係創意嘅表現咁話。


中大學者沈旭暉曾經形容楊偉雄係見到男偶像嘅少女，楊偉雄回應網上一片抽水潮時，就解釋話早前出席科技論壇，同年輕人對話時，係希望用「赤子之心」同出席者討論，但可能因為自己廣東話唔太流利，所以先喺語氣上造成誤會，又強調係想同年輕人分享Steve Jobs嘅前瞻性，鼓勵年輕人要有大膽思維。


楊偉雄喺訪問中被問到，當傳統產業同創新科技有利益衝突，例如的士業同Uber，佢會企喺邊一方，楊偉雄就答自己會企喺創新科技嘅一邊，但強調推行新技術要平衡各方利益，而修改法例係大動作，所以係咪喺法例上彈性處理創新科技，要睇準時機先可以推動喎。