新東候選人嚴寒下搶曝光 成智去「融冰」 浩鼎車上遊

【明報專訊】噚日香港市區氣溫跌到攝氏三四度，大帽山係負幾度，相信唔少市民都選擇留喺屋企，但立法會新界東補選在即，有候選人幾凍都要外出爭取曝光。新思維黃成智同幾個黨員噚日走出新東，凌晨兩點幾由荃灣出發行上大帽山山腰，佢形容呢趟係「融冰之旅」，話自己無懼風霜，會融化立法會嘅「嘈吵和胡亂拉布問題」咁話。唔知新界東選民又點睇呢條零下幾度嘅「第三條路」呢？


另邊廂，民建聯周浩鼎噚日就「行正路」吹風，喺新東搞巴士同單車巡遊。Emily見到周浩鼎迎住冷風雨，企喺開篷巴士上層同途人揮手，睇到都覺得凍，所以佢都話辛苦晒一班義工，頂住嚴寒幫佢助選。陪佢一齊企嘅工聯會鄧家彪就話，「地面3.3度，開篷巴士上，我諗得0.3度！」周浩鼎噚日亦喺大埔同北區舉行誓師大會，其中喺大埔，除咗民建聯一班領導層外，新民黨主席葉劉淑儀、田北辰都喺寒風下出席，好畀面。


至於公民黨楊岳橋，噚日因為天氣關係，取消咗喺寶琳嘅戶外造勢活動，不過仍然留喺將軍澳商場外拉票，話「無得懶」咁話。新界東補選其他候選人，包括方國珊、劉志成、梁思豪，同本土民主前線梁天琦。