陳恒鑌想上山派熱奶不果

【明報專訊】呢幾日都有唔少人心口掛個「勇」字走去大帽山睇冰霜，包括民建聯立法會議員陳恒鑌（Ben）。佢前晚開車諗住直驅山頂，但話低估咗大家抵抗嚴寒嘅熱情，去到山腰嘅大帽山道已經大塞車，呆等咗兩個鐘，結果放棄登山。唔少人登山後不適，搞到要勞煩消防拯救，而阿Ben同Emily講，上山裝備好緊要，而佢就一早喺車廂內放咗大保溫箱，準備咗幾十支熱維他奶，話本來準備上到山派奶，想同登山者一齊飲熱奶賞冰，結果無法如願。阿Ben話，呢幾日天冷落雨，而警察要冒住嚴寒天氣喺山下維持交通秩序，所以向佢哋致敬喎。