少數族裔廣東話挑戰賽 巴基斯坦女孩 佔中話劇獲獎

【明報專訊】「欣賞香港」活動之一嘅「第一屆全港少數族裔廣東話挑戰賽」頒獎禮噚日舉行，廠商會蔡章閣中學兩名巴基斯坦裔中五女生麗雪欣及花禮立，用咗前年發生嘅雨傘運動創作話劇，獲得中學組小組賽冠軍。


劇中花禮立飾演一個孕婦，同正在「佔中」嘅學生麗雪欣講「黃絲帶做唔到啲咩」；麗雪欣就向花禮立解釋，有真普選係為咗下一代，「將來見到一個更好嘅香港」。有「身孕」嘅花禮立後尾肚痛作動，麗二話不說立即攙扶花。花反問「點解我對你咁差，你仲對我咁好嘅」。


黃藍絲一樣 「唔使用顏色鬥」

佢哋同Emily講，成個劇本用咗3日完成，練習咗一星期，學校都好支持佢哋用呢個劇本參賽。佢哋又話佔中發生時少數族裔無乜機會發聲，「本地人講，講唔到我哋嘅感受」，所以希望藉住呢個平台同大家講，冇咗「藍色」、「黃色」，大家其實無乜分別，「唔使用顏色鬥」。


佢哋又話，佔中期間一星期去足幾日，亦有參與學校學生會罷課，認為市民有自由投票選特首。